Nicky Butt lét Alejandro Garnacho heyra það í nýlegu viðtali og telur Manchester United hafa gert rétt með að selja hann.
Butt, sem var akademíustjóri United þegar Garnacho kom til félagsins, sagði leikmanninn hafa haft ákveðið viðhorf frá upphafi. „Hann var alltaf svolítið fjarlægur og hafði mjög hátt álit á sjálfum sér,“ sagði Butt.
Hann gagnrýndi einnig hversu hratt Garnacho fékk stjörnustöðu. „Hann komst í aðalliðið og fékk stjörnustöðu allt of fljótt. Einhver í kringum liðið hefði átt að halda honum niðri, kannski reyndu þeir það en hann hlustaði ekki.“
Butt hrósaði þó hæfileikum hans að einhverju leyti. „Hann skoraði magnaða hjólhestaspyrnu, það var frábært,“ sagði hann, en bætti við að það hefði kannski aukið væntingar og pressu of snemma.
Hann telur að Anthony Elanga hafi á sínum tíma sýnt meiri fyrirheit innan akademíunnar. Garnacho, sem nú er hjá Chelsea, hefur átt erfitt uppdráttar og hefur gagnrýni Butt vakið talsverða athygli.
