Freddie Woodman gæti fengið tækifæri í marki Liverpool á næstu vikum eftir meiðsli hjá Giorgi Mamardashvili.

Mamardashvili hafði verið í byrjunarliðinu undanfarið í fjarveru Alisson Becker sem hefur verið frá vegna meiðsla. Í leik gegn Everton um helgina meiddist Georgíumaðurinn hins vegar illa eftir samstuð við sóknarmanninn Beto.

Hann hlaut djúpt sár á fæti og þurfti að yfirgefa völlinn á börum eftir langa meðhöndlun. Woodman kom þá inn á og lék sinn fyrsta leik fyrir Liverpool.

Þó meiðslin séu ekki eins alvarleg og óttast var, er Mamardashvili talinn verða frá í nokkrar vikur. Það gæti þýtt að Woodman standi í markinu í leikjum gegn Crystal Palace og Manchester United.

Þetta er enn eitt áfallið fyrir Liverpool sem hefur glímt við töluverð meiðslavandræði á tímabilinu.