Dæmi sem BBC nefnir eru til dæmis yfirlýsing forsetans frá 9. mars sl. þar sem hann lýsti því yfir að Íransstríðinu væri svo gott sem lokið. Þessi ummæli féllu í viðtali forsetans hjá CBS News en skömmu áður en viðtalið fór í loftið, eða um 47 mínútum fyrir birtingu, mátti sjá aukna hreyfingu í fjárfestingum á olíu. Eftir að viðtalið birtist hrundi olíuverð þar sem markaðurinn sá fyrir sér að olíuflutningar um Hormússundið, sem Íranir höfðu lokað, yrðu aftur mögulegir. Þessir fjárfestar sem seldu fyrir yfirlýsinguna náðu því að græða töluvert.
Annað dæmi er frá 23. mars þegar forsetinn birti færslu á TruthSocial og lýsti því aftur yfir að stríðinu væri svo gott sem lokið. Þessi yfirlýsing leiddi sömuleiðis til lækkunar á olíuverði en nokkrum mínútum áður en færslan birtist mátti sjá hreyfingar á olíumarkaði þar sem ákveðnir fjárfestar virtust veðja á að olíuverð væri við það að hrynja. Samkvæmt sérfræðingi sem BBC ræddi við var um óvenjuleg viðskipti að ræða.
Eins nefnir BBC tollastríð forsetans. Þann 2. apríl á síðasta ári lagði Trump háa tolla á nánast allan heiminn sem leiddi til hruns á hlutabréfamörkuðum. Viku síðar, þann 9. mars, frestaði Trump nánast öllum tollum, nema þeim sem lagðir voru á Kína, í þrjá mánuði. Þetta varð til þess að hlutabréfamarkaðurinn tók hressilega við sér. BBC sýnir að áður en Trump tilkynnti um frestinn hafi óvenjulega miklar hreyfingar átt sér stað á mörkuðum þar sem fjárfestar hafi veðjað á að verð væri við það hækka. Tæpum 20 mínútum síðar tilkynnti Trump um frestunina. Sumir fjárfestar hafi veðjað hundruðum milljóna á að markaðurinn væri við það að taka við sér þrátt fyrir að markaðurinn hafi verið rauður í um viku. Áætlar BBC að sumir fjárfestar hafi náð að græða milljarða á þessum viðskiptum.
Þann 3. janúar var forseti Venesúela, Nicolás Maduro, handtekinn af Bandaríkjaher. Nokkrum dögum áður hafði notandi á veðmálasíðunni Polymarket veðjað á að Maduro yrði komið úr embætti fyrir janúarlok. Þessi notandi kallaði sig Burdensome-Mix og þegar Maduro var handtekinn nokkrum dögum síðar græddi þessi notandi tæpar 55 milljónir á veðmálinu. Sonur Trumps, Donald Trump Jr., er hluthafi í Polymarket og situr í stjórn fyrirtækisins.
Eins mátti finna veðmál á Polymarket hvað varðar innrás í Íran. Sex notendur skráðu sig á síðuna í febrúar og veðjuðu allir á að Bandaríkin gerðu innrás í Íran þann 28. febrúar. Þessir aðilar græddu samanlagt um 120 milljónir á veðmálinu. Fimm af þessum sex notendum hafa ekki tekið þátt í veðmálum síðan þetta átti sér stað. Sá sjötti græddi um 20 milljónir til viðbótar því hann veðjaði á að Bandaríkin og Íran næðu samkomulagi um vopnahlé fyrir 7. apríl, en tilkynnt var um vopnahlé einmitt þann dag.
BBC greinir eins frá því að Hvíta húsið hafi sent erindi til starfsmanna í mars þar sem þeir voru varaðir við því að nýta sér innherjaupplýsingar á veðmálasíðum sínum. Miðillinn tekur loks fram að það sé erfitt að sanna innherjaviðskipti og ekkert af þeim fjármálastofnunum sem BBC leitaði til vegna fréttaflutnings gekkst við því að slík brot hafi átt sér stað eða að ásakanir hafi borist um slíkt.
Paul Oudin, prófessor sem sérhæfir sig í lögum um fjármálaeftirlit og starfar við ESSEC-viðskiptaháskólann, segir erfitt að sækja fólk til saka fyrir innherjaviðskipti þegar ekki er hægt að sanna hvaðan innherjaupplýsingarnar koma. Það sé hægt að sjá skýr merki um það að sumir hafi vitað fyrirfram um yfirlýsingar sem voru við það að koma frá forsetanum, en ólíklegt sé að þessir aðilar verði sóttir til saka.
