Laufey Lín sýnir á sér nýja hlið í skemmtilegu myndbandi á YouTube þar sem hún ber íslenskan mat saman við þann breska. Hún býr til fullkomna pylsu, útskýrir hvers vegna harðfiskur er eitt magnaðasta próteinið í heimi og gefur afar einlæga dóma um breska klassíska rétti.
„Þetta lyktaði strax eins og eitthvað íslenskt“, segir Laufey þegar hún lyftir lokinu af fyrstu réttunum. Þar eru bresku Greggs-pylsurnar á móti þeim íslensku.
„Hér erum við með íslenskar pylsur, sem eru bestu pylsur í heimi. Lyktar eins og heima. Þetta er líklega ljótasta pylsa sem ég hef búið til. Þetta er svo gott, bestu pylsur í heimi.“
Í myndbandinu ber Laufey einnig saman harðfisk við kráarsnakk, flatköku og ost á móti samloku og Appelsín á móti Irn-Bru. Laufey segir þarna komna sína uppáhalds rétti frá barnæsku og ver íslenska matinn af stakri snilld.
