Það eru engar líkur á að Leeds muni leggja rútunni í leikjum sínum á þessu tímabili í ensku úrvalsdeildinni og gera allt til að verja eigið mark frekar en að skora.

Þetta segir Daniel Farke, stjóri liðsins, en hans menn spila við Arsenal á útivelli í dag klukkan 16:30.

Leeds spilaði flottan fótbolta í næst efstu deild á síðustu leiktíð en enska úrvalsdeildin er allt annað skrímsli.

,,Við ætlum ekki að losa okkur við eigin hugmyndafræði því við erum í ensku úrvalsdeildinni og leggja rútunni,“ sagði Farke.

,,Ef þú reynir að verjast í 96 mínútur eða eitthvað í þá áttina þá er ekki hægt að lifa af.“

,,Þú þarft að sjá til þess að þú sért með boltann á tímum og láta hitt liðið eyða smá orku. Við viljum skapa færi og viljum hræða andstæðinginn.“

,,Það munu koma tímar þar sem við þurfum að þjást en við þurfum að vera vel skipulagðir og standa saman.“