Héraðsdómur Reykjavíkur hafnaði í morgun kröfur Lögreglustjórans á höfuðborgarsvæðinu um gæsluvarðhald yfir manni sem handtekinn var í fyrradag í tengslum við rannsókn á ráni hraðbanka Íslandsbanka í Mosfellsbæ á þriðjudagsnótt.

Sveinn Andri Sveinsson, verjandi mannsins, segir að í kröfu lögreglunnar um gæsluvarðhald hafi skort rökstuddan grun:

„Lögregla getur haft ýmsa menn grunaða um ýmislegt, það eru bara hefðbundin störf löreglu þegar henni berast upplýsingar og símtöl og þar sem um er að ræða einhverjar getgátur. Það er bara eins og það er og þá getur lögregla haft menn grunaða. En til þess að hægt sé að hneppa menn í gæsluvarðhald þá þarf að vera til staðar það sem kallast rökstuddur grunur. Í þessari kröfugerð lögreglunnar um gæsluvarðhald yfir skjólstæðingi mínum var ekki að sjá að væri til staðar þessi rökstuddi grunur, sem lögin áskilja. Enda kemur í ljós í úrskurðinum að dómari taldi svo ekki vera.“

Sveinn Andri segir að krafan hafi verið byggð á innhringingum til lögreglunnar sem hafi innihaldið sögusagnir, meðal annars um að maðurinn kunni á skurðgröfu. Aðspurður segir Sveinn Andri að skjólstæðingur hans kunni á gröfu. „En það eru líka margir aðrir sem kunna á gröfu, þetta er útbreidd þekking og ekki hægt að slá þessu fram sem sönnunargögnum.“

Lögreglustjórinn á höfuðborgarsvæðinu mun kæra úrskurðinn til Landsréttar. Landsréttur mun kveða upp sinn úrskurð á morgun.