Ragnhildur Þórðardóttir, betur þekkt sem Ragga nagli, fjallar í sínum nýjasta pistli á Facebook um óraunhæfar væntingar okkar til sjálfsins og líkama okkar og hvað það gerir þegar við berum líkama okkar saman við aðra og/eða fyrri útgáfu af sjálfum okkur.

„Líkamar breytast út af alls konar.

Breyttar heilsuvenjur.

Breytt heilsufar.

Breyttur hormónabúskapur.

Breytt tímatafla.

Aukinn aldur.

Þú hefur kannski minni tíma til að æfa en áður.

Estrógen og testósterón dvínandi með aldri.

Þú ert að jafna þig eftir veikindi.

Þú tókst pásu frá æfingum.

Þú hefur verið slakari í mataræðinu.

Þú gekkst með barn.

Þú ert þreyttari en áður.

Útlit, lögun og geta líkamans getur verið önnur í dag.

Samanburður við gamla útgáfu skrokks vekur hjá okkur stöðugar tilfinningar um að vera ekki nóg, gera ekki nóg, eiga ekki nóg.“

Ragga segir að slíkt ræni þig ekki bara gleðinni, heldur hvatningu og drifkrafti með að bera þig saman við aðra og fyrri útgáfu af sjálfum þér.

„Hugsanir um að þetta heilsubrölt sé hvort sem er ekki þess virði því þú verður hvort sem er aldrei eins og barnlausi inflúensarinn með allan heimsins tíma.

Þú verður hvort sem er aldrei eins og leikkonan sem hefur einkaþjálfara, kokk, hreingerningakonu og barnapíu á launaskrá. 

Óraunhæfum væntingum til sjálfsins og ómannlegum kröfum fylgir ekkert nema neikvæð sjálfsmynd, lundin verður níðþung og sjálfstraustið fer niður í kjallara.

Óháð því hvort þú syrgir fyrrum útgáfu líkamans.

Hann þarf samt ást og virðingu. Hann á samt skilið að þú heiðrir þörf hans til að hreyfa sig. Líkaminn á skilið úrvals næringu. Hann þarf góðan svefn. Hann er samt þinn helsti bandamaður.“

Ragga segir að þú þurfir ekki endilega að gera alltaf betur í dag en í gær.

„Miklu frekar, ertu að gera þitt besta fyrir heilsuna í dag út frá aðstæðum?

Er það tíu mínútna æfing. Er það grænmeti með einni máltíð. Er það að drekka nóg af vatni yfir daginn. Er það að fara í göngutúr. Eða snemma að sofa.

Ef svarið er já, þá ertu að setja í sparibauk heilsunnar.

Stundum er það þúsund kall. Stundum bara króna.

Hver einasta lítil heilsuhegðun styrkir sjálfsmyndina að þú sért heilsumelur.“