
Dusan Vlahovic verður ekki áfram hjá Juventus en félagið og leikmaðurinn hafa endanlega slitið samningaviðræðum sínum.
Serbneski framherjinn yfirgefur félagið því á frjálsri sölu þegar samningur hans rennur út í lok mánaðarins.
Vlahovic ku hafa farið fram á átta milljónir evra í árslaun ásamt háum bónus- og umboðsmannagreiðslum, en Juventus vildi ekki fara hærra en sex milljónir evra auk árangurstengdra greiðslna.
Chelsea, Newcastle, Barcelona og Bayern Munchen hafa öll verið orðuð við framherjann.
Vlahovic kom til Juventus frá Fiorentina árið 2022 fyrir um 70 milljónir evra.