Teymi Kylian Mbappé hefur svarað gagnrýninni sem beinst hefur að franska stórstjörnunni síðustu daga eftir að stuðningsmenn Real Madrid létu óánægju sína í ljós vegna ferðar hans til Sardiníu á meðan hann er frá vegna meiðsla.

Mbappé hefur sætt harðri gagnrýni eftir að myndir birtust af honum í fríi með kærustu sinni, leikkonunni Ester Expósito, á sama tíma og Real Madrid er á barmi þess að missa spænska meistaratitilinn til Barcelona.

Nú hefur hans fólk sent frá sér yfirlýsingu til AFP-fréttastofunnar þar sem gagnrýninni er hafnað.

„Hluti gagnrýninnar byggir á of mikilli túlkun á atriðum sem tengjast endurhæfingartímabili sem er stranglega undir eftirliti félagsins,“ segir í yfirlýsingunni.

Þá er því einnig hafnað að Mbappé sýni skort á metnaði eða skuldbindingu gagnvart liðinu. „Þetta endurspeglar alls ekki raunveruleikann varðandi þá vinnu og þá skuldbindingu sem Kylian sýnir daglega fyrir hag liðsins.“

Mbappé hefur verið frá vegna vöðvameiðsla í vinstri fæti og Real Madrid hefur átt undir högg að sækja án hans á lokakafla tímabilsins.

Stuðningsmenn félagsins hafa þó gagnrýnt tímasetningu ferðarinnar harðlega og telja hana óheppilega á viðkvæmum tímapunkti í titilbaráttunni.