Stuðningsmenn Real Madrid hafa lýst yfir mikilli óánægju með Kylian Mbappé á sama tíma og liðið virðist á leiðinni að missa spænska meistaratitilinn til erkifjendanna í Barcelona.
Barcelona er með ellefu stiga forskot á toppi La Liga og Real Madrid gæti formlega tapað titlinum í næstu viku þegar liðin mætast í El Clásico.
Reiði stuðningsmanna beinist að Mbappé þrátt fyrir að hann sé frá vegna vöðvameiðsla í vinstri fæti. Frakkinn vakti athygli þegar hann sleppti því að fylgjast með leik Real gegn Espanyol og fór þess í stað í frí til Sardiníu með kærustu sinni, leikkonunni Ester Expósito.
Myndir af parinu á snekkju fóru í dreifingu og stuðningsmenn tóku að birta færslur á samfélagsmiðlum með skilaboðunum „Mbappé out“.
Samkvæmt AS eru einnig innan herbúða Real menn ósáttir við tímasetningu ferðarinnar og telja hana hafa fjarlægt Mbappé frá klefanum.
