Dujon Sterling, leikmaður Rangers, hefur verið sviptur ökuleyfi sínu í 12 mánuði eftir að hafa ekið undir áhrifum áfengis og lent í árekstri í Glasgow.
Sterling, sem er 26 ára gamall, var stöðvaður eftir að hafa keyrt glannalega um miðborgina aðfaranótt 4. janúar og endað á því að keyra á vegrið nærri M8 hraðbrautinni. Hann reyndist vera nær þrefalt yfir leyfilegum mörkum.
Dómstóll sektaði hann einnig um 2250 pund, en hann játaði bæði ölvunarakstur og að hafa ekið af gáleysi.
Samkvæmt gögnum málsins sást hann aka á miklum hraða, skipta um akreinar án þess að gefa stefnuljós og keyra um stund á röngum vegarhelmingi áður en slysið varð.
Verjandi Sterling sagði hann iðrast mjög. Rangers hefur þegar sektað hann vegna málsins.
