Morgan Gibbs-White hefur sýnt hversu alvarleg höfuðmeiðsli hann varð fyrir í sigri Nottingham Forest á Chelsea á mánudag.
Miðjumaðurinn kom inn á sem varamaður í síðari hálfleik en þurfti að fara aftur af velli eftir aðeins 20 mínútur þegar hann lenti í hörðum árekstri við markvörð Chelsea, Robert Sánchez.
Atvikið átti sér stað þegar Gibbs-White var kominn í gegn og Sanchez kastaði sér út í boltann. Báðir leikmenn féllu til jarðar og þurftu tafarlausa aðhlynningu eftir að hafa fengið skurði í samstuðinu.
Eftir leik birti Gibbs-White mynd af meiðslunum á samfélagsmiðlum þar sem sjá mátti langan saumaskurð frá nefi upp fyrir vinstri augabrún. Þá var nefið einnig bólgið eftir höggið.
„Takk fyrir skilaboðin. Frábær sigur,“ skrifaði enski landsliðsmaðurinn með myndinni.
Sanchez birti sömuleiðis mynd af sínum meiðslum og óskaði Gibbs-White góðs bata. Báðir leikmenn þurftu að fara af velli með bundið um höfuðið eftir óhugnanlegt atvikið.
