Landsliðskonurnar Glódís Perla Viggósdóttir og Karólína Lea Vilhjálmsdóttir voru gestir Helga Fannars Sigurðssonar í nýjasta þætti af Íþróttavikunni.

Eins og margir vita er Karólína frænka Gylfa Þórs Sigurðssonar. Fylgist hún þar af leiðandi mikið með Víkingi, hvar hann spilar í dag.

Var hún hissa að sjá hann byrja opnunarleik Bestu deildarinnar gegn Breiðabliki á dögunum. Mikið hafði verið rætt um meiðsli hans í aðdraganda leiksins en hann harkaði af sér og spilaði leikinn.

„Hann er svo fyndinn. Ég fór í kaffi til hans þremur dögum fyrir leikinn og þá gat hann varla gengið því hann var svo haltur,“ sagði Karólína og hló.

Gylfi skoraði mark Víkings svo í 1-1 jafntefli.

„Ég ætlaði á leikinn en ég hélt að hann myndi ekki spila svo ég var bara heima. Svo var hann bara að byrja og skoraði þannig ég var ekkert smá stolt af honum,“ sagði Karólína um frænda sinn.

Nánar í spilaranum.