Íþróttavikan kemur út alla föstudaga á 433.is og í Sjónvarpi Símans. Þar fá þeir Helgi Fannar Sigurðsson og Hrafnkell Freyr Ágústsson til sín góðan gest og þessa vikuna var Gunnar Birgisson, íþróttafréttamaður á RÚV, gestur.

Gylfi Þór Sigurðsson fór á kostum með Lyngby í vikunni og gerði tvö mörk í danska bikanum. Frammistaða Gylfa var rædd í þættinum.

„Ég er búinn að horfa á Lyngby leiki undanfarið og verð að viðurkenna það að þetta er ekki það skemmtilegasta sem ég geri. Það er leiðinlegt að segja þetta en ég held að eftir tímabilið þurfi Gylfi að koma sér í lið sem spilar meiri fótbolta. Það mun henta honum betur,“ sagði Hrafnkell í þættinum.

Gunnar telur að Gylfi gæti komist á enn hærra stig á ný.

„Miðað við hvernig Danirnir tala um hann og hvernig honum var tekið þegar hann kom fyrst inn á myndi ég halda að lið eins og FCK eða Midtjylland gætu alveg tekið hann.“

Telur hann einnig að Gylfi gæti spilað í deildum eins og í Belgíu og Hollandi.

„Gylfi hentar í mjög marga leikstíla og margar deildir.“

Umræðan í heild er í spilaranum.