Sagt var frá því í Dr. Football í dag að Jonathan Hendrickx muni leika sinn síðasta leik fyrir KA gegn Keflavík í Pepsi Max-deildinni í kvöld.

Hinn 27 ára gamli Hendrickx kom til KA frá Lommel í Belgíu, heimalandi hans, fyrir tímabilið í Pepsi Max-deildinni. Nú er hins vegar útlit fyrir að hann klári ekki tímabilið fyrir norðan.

,,Ætli það sé ekki heimþrá númer svona 362, hjá honum og hans fjölskyldu,“ sagði Kristján Óli Sigurðsson. Hendrickx hefur einnig leikið með FH og Breiðabliki á hér á landi en alltaf leitað frá Íslandi fyrir rest.

Hjörvar Hafliðason, þáttastjórnandi, velti því upp hvort að lið hér heima ætti ekki að vita betur en að sækja Hendrickx, vitandi það að leikmaðurinn virðist gjarnan fá heimþrá.

,,Ætla menn ekkert að læra? Alltaf að sækja þennan gæa og setja pening í hann.“

,,Ég ætla rétt að vona að hann sé með færri líf en kötturinn því þetta er komið gott. KA er í bullandi Evrópubaráttu og hann er lykilmaður í þessu liði. Þeir reyndar sótttu einhvern Dana í gær sem er bakvörður en Hrannar er ‘out for the season’. Þessi mekanismi á bakvið þetta er bara einfaldur. Það er eitthvað að í hausnum á manninum,“ sagði Kristján Óli.

Hann bætti einnig við að launapakki Hendrickx væri ekki lítill.

,,Það er líka ekki eins og hann sé með ódýrari mönnum deildarinnar. Hann er pottþétt dýrasti leikmaður KA og örugglega topp tíu í deildinni.“