Pep Guardiola, knattspyrnustjóri Manchester City, segist ekki hafa þráhyggju fyrir Meistaradeild Evrópu.
Guardiola, sem hefur unnið Meistaradeild Evrópu tvisvar með spænska liðinu Barcelona, hefur ekki komist lengra en 8-liða úrslit í keppninni eftir að hafa tekið við Manchester City.
Talið er að ein stærsta ástæðan fyrir því að hann hafi verið fenginn til liðsins væri að gera atlögu að sigri í Meistaradeildinni.
„Við munum gera okkar besta. Við eigum góðan möguleika á því að komast upp úr okkar riðli. Það er mjög gott og þá erum við meðal 16 bestu liða Evrópu,“ sagði Guardiola í viðtali.
Manchester City datt óvænt úr keppni á síðasta tímabili eftir tap gegn franska liðinu Lyon.
„Ég bjóst við viðbrögðum frá liðinu á þessu tímabili eftir að við biðum í lægra haldi gegn Lyon í Portúgal. Við vitum hvað við þurfum að gera,“ sagði Guardiola.
Manchester City mætir gríska liðinu Olympiakos á morgun og getur komist skrefi nær útsláttarkeppni Meistaradeildar Evrópu.
