Miðjumaðurinn Oliver Sigurjónsson er genginn aftur í raðir Breiðabliks en þetta var staðfest í kvöld.

Oliver er 24 ára gamall leikmaður en hann hefur undanfarin ár reynt fyrir sér í atvinnumennsku.

Oliver spilaði með Bodo/Glimt og AGF í Skandinavíu en hefur nú gert þriggja ára samning við Blika.

Tilkynning Breiðabliks:

Þau ánægjulega tíðindi voru að berast að miðjumaðurinn snjalli, Oliver Sigurjónsson, er kominn heim eftir 2 ára dvöl í Noregi en hann hefur skrifað undir 3ja ára samning við Breðablik. Þetta eru frábærar fréttir enda Oliver gríðarlega öflug viðbót við Blikahópinn. „Það er fagnaðarefni fyrir Blika að fá Oliver til liðs við okkur enda er hann frábær knattspyrnumaður og mikill karakter. Það er ljóst að hann mun styrkja lið okkar,“ segir Óskar Hrafn Þorvaldsson þjálfari.

Oliver, sem er 24 ára gamall, á að baki 93 leiki með meistaraflokki Breiðabliks og hefur skorað 8 mörk. Hann á að baki tvo A-landsleiki og hvorki fleiri né færri en 50 leiki með yngri landsliðum Íslands. Oliver lék um tíma með AGF í Danmörku og svo Bodö/Glimt í Noregi.

Velkominn heim Oliver 💚