VSV og Ísfélagið mega selja til Hvíta-Rússlands – Stórkaupandi „liðkaði fyrir“
Fjögur íslensk sjávarútvegsfyrirtæki hafa fengið leyfi til að selja vörur til Hvíta-Rússlands þar sem þau hafa verið á tímabundnum bannlista. Framkvæmdastjóri Vinnslustöðvarinnar í Vestmannaeyjum (VSV) segir hvítrússneskan stórkaupanda á íslenskum sjávarafurðum hafa „liðkað fyrir“ undanþágunni frá bannlista Tollabandalags Rússlands, Hvíta-Rússlands og Kasakstans. Fyrirtækin sem um ræðir eru VSV, Ísfélag Vestmannaeyja, Skinney-Þinganes og Huginn VE í Vestmannaeyjum.
„Öll þessi fyrirtæki voru að fá leyfi til að flytja inn til Hvíta-Rússlands. Þetta er unnið í samvinnu við stærsta viðskiptavin okkar þar, Santa Bremor. Hann hefur verið stærsti kaupandinn á íslenskum loðnuhrognum en útflutningurinn er ekki hafinn en við eigum þennan valmöguleika,“ segir Sigurgeir Brynjar Kristgeirsson, framkvæmdastjóri VSV.
Vinnslustöðin, Skinney-Þinganes og Huginn VE hafa öll verið á bannlista tollabandalagsins síðan í febrúar 2015. Ísfélagi Vestmannaeyja var bætt á listann á aðfangadag í fyrra ásamt nokkrum öðrum sjávarútvegsfyrirtækjum. Þau hafa því ekki mátt selja afurðir til landa tollabandalagsins ofan á innflutningsbann Rússa á íslenskar sjávarafurðir sem tók gildi í ágúst 2015. DV greindi í september það ár frá úttekt sendinefndar tollabandalagsins, sem þá stóð yfir, á íslenskum fiskvinnslum í eigu nokkurra stærstu útgerðarfélaga landsins. Óttuðust útflytjendur sem blaðið ræddi þá við að sala þeirra til Hvíta-Rússlands og Kasakstans yrði einnig stöðvuð sem og að úttektin gæti leitt til þess að fyrirtæki þeirra yrðu áfram í innflutningsbanni til tollabandalagsins færi svo að Rússar ákvæðu að leyfa aftur innflutning á íslenskum fiski.
Samkvæmt vefsíðu Matvælastofnunar Rússlands eru nú alls átta íslensk fyrirtæki í sjávarútvegi eða kjötframleiðslu á bannlista tollabandalagsins. Fyrirtækin fjögur sem um ræðir hafa þar verið merkt með gulum lit síðan 20. september síðastliðinn og innflutningur á vörum þeirra til allra landanna þriggja því ekki verið heimilaður. Sigurgeir Brynjar segir ákvörðunina um að leyfa sölu til Hvíta-Rússlands vera mikilvægt fyrsta skref.
„Santa Bremor hefur verið að kaupa um þrjú þúsund tonn af loðnuhrognum á ári sem fara á um þrjá og upp í fimm dollara kílóið eftir árferði. Síðan er auðvitað síld sem hann er mjög stór framleiðandi að og hefur keypt um 20 þúsund tonn af síld í heildina frá Íslandi og Noregi,“ segir Sigurgeir.
Sjávarútvegsfyrirtækin FISK-Seafood á Sauðárkróki, Búlandstindur á Djúpavogi, Frostfiskur í Þorlákshöfn og Loðnuvinnslan á Fáskrúðsfirði eru enn á bannlista tollabandalagsins ásamt afurðum af Vilhelmi Þorsteinssyni EA, fjölveiðiskipi Samherja á Akureyri. Kjötframleiðendurnir Kaupfélag Skagfirðinga (KS) og Sláturfélag Suðurlands eru þar einnig ásamt Sláturhúsi KVH á Hvammstanga sem er í eigu KS. Innflutningsleyfi þeirra voru afturkölluð í febrúar í fyrra.
