Forsvarsmenn Miss Grand International sögðu hana of feita
„Ég ætla að standa uppi fyrir sjálfri mér, öllum konum og íslensku þjóðinni. Ég ætla ekki að láta segja mér að ég hafi of mikla fitu utaná mér til þess að vera flott uppi á sviði. Ég er hætt.“ Þetta skrifar fegurðardrottningin Arna Ýr Jónsdóttir sem er stödd í Las Vegas þar sem hún ætlaði að keppa í fegurðarsamkeppninni Miss Grand International.
Fyrir tveimur dögum gagnrýndi Arna Ýr forsvarsmenn keppninnar fyrir að segja hana of feita. Hún sagði frá því hvernig henni var bannað að fá sér hádegismat og var stöðvuð þegar hún ætlaði að fá sér hnetur og sagt að þær væru ekki fyrir hana.
Í gær lýsti Arna því yfir að um misskilning hafi verið að ræða og skipuleggjendur keppninnar væru miður sín, misskilningurinn hefði orsakast vegna tungumálaörðugleika hjá starfsfólki keppninnar. En nú er komið á daginn að enginn misskilningur átti sér stað.
„Þetta var ekki misskilningur heldur var mér sagt að segja það og ég sé hrikalega eftir því,“ skrifar Arna á facebook. Að lokum þakkar Arna fyrir stuðninginn og segist fara heim sem sigurvegari og stoltasti Íslendingur í heimi.