Þetta er vinsæl kenning hjá mörgum þekktum stríðsbloggurum sem hafa ekki haldið aftur af sér við að deila henni að undanförnu.
B.T. spurði tvo sérfræðinga að þessu og vildi hvorugur þeirra hafna þessari kenningu.
„Ég get vel sett mig inn í þennan hugsunarhátt um að Pútín telji að það gangi svo illa í Úkraínu að hann neyðist til að finna eitthvað annað til að beina athyglinni frá því,“ sagði Claus Mathiesen, lektor við danska varnarmálaskólann.
Það er ljóst að það gengur ekki eins vel í Úkraínu og Pútín vildi. Þegar hann gaf hernum fyrirskipun um að ráðast inn í Úkraínu í febrúar 2022 voru ráðamenn í Kreml þess fullvissir að það tæki aðeins nokkra daga eða vikur að sigra Úkraínumenn.
Nú er stríðið komið inn í sitt fimmta ár og febrúar og mars voru tveir verstu mánuðir rússneska hersins í Úkraínu síðan 2023.
Úkraínumenn náðu að endurheimta meira land en Rússar náðu að leggja undir sig. Vorsókn Rússa virðist vera algjörlega misheppnuð þrátt fyrir digurbarkalegar yfirlýsingar yfirmanna hersins.
Úkraínumenn hafa gert það ótrúlega gott í hönnun dróna og vélmenna sem bæta upp það sem þá vantar af mannskap í herinn.
Þetta þýðir að Úkraínumenn hafa verið ótrúlega góðir við að fella rússneska hermenn. Það hafa þeir gert í svo miklum mæli síðustu mánuði að Rússar geta ekki lengur bætt mannfallið upp með nýskráningum í herinn.
Það eykur þrýstinginn á Pútín að vaxandi óánægju gætir meðal almennings vegna hás matvælaverðs, bensínskorts, lokunar á Internetinu og fjölda annarra hluta.
Út frá þessu telja margir að hann verði sífellt hættulegri hvað varðar hugsanlega árás á NATÓ og Evrópu.
„Það getur vel verið að Pútín sé næstum kominn á þann stað að honum gæti dottið í hug að láta til skara skríða til dæmis í Eystrasaltsríkjunum eða Póllandi. Þeir eru undir pressu í Úkraínu og þá getur sú hugsun komið upp hverju það geti skilað ef hert verður á fjölþáttastríðinu,“ sagði Flemming Splidsboel, sérfræðingur í málefnum Rússlands hjá dönsku hugveitunni DIIS.
„Það er hérna sem þetta getur orðið alvarlegt. Fyrir Rússland og Pútín getur orðið freistandi að ganga lengra en bara með fjölþáttastríði og þá gæti árás á til dæmis Eystrasaltsríkin komið til greina,“ bætti Splidsboel við.
