Framkvæmdastjóri NATO sendi Donald Trump Bandaríkjaforseta vægast sagt smeðjuleg skilaboð í dag, en þar þakkar Mark Rutte forsetanum fyrir að hafa aukið öryggi í Evrópu með aðgerðum sínum í Íran og með því að þvinga Evrópuþjóðir til að auka útgjöld til varnarmála.

Skilaboðin hafa vakið töluverða athygli en samkvæmt BBC hefur NATO staðfest að skilaboðin, sem Trump deildi sjálfur á samfélagsmiðlum, séu raunveruleg.

„Herra forseti, kæri Donald. Til hamingju og takk fyrir afdráttarlausar aðgerðir í Íran sem voru sannarlega einstakar og nokkuð sem enginn annar þorði að gera. Þetta hefur gert okkur öll öruggari. Þú átt svo í vændum annan stórsigur í Haag í kvöld. Það var ekki auðvelt, en okkur tókst að fá alla til að samþykkja 5 prósent! Donald, þú hefur leitt okkur að virkilega, virkilega mikilvægum tímamótum fyrir Ameríku, Evrópu og heiminn. Þú munt ná árangri sem ENGINN bandarískur forseti hefur náð áratugum saman. Evrópa mun BORGA, eins og hún á að gera og það er þinn sigur. Góða ferð og sjáumst í kvöld í kvöldverði hans hátignar!“

BBC rekur að margir leiðtogar hafi gripið til smjaðurs í samskiptum sínum við forseta Bandaríkjanna, þó svo að þeir kæri sig líklega ekkert um að fleðulætin séu birt á opinberum vettvangi. Engu að síður hafi Rutte gengið nokkuð langt í skilaboðunum, sem séu vægast sagt uppskrúfuð. Eins hafi Rutte notað hástafi til áhersluauka, í anda þess hvernig Trump tjáir sig á netinu.

Leiðtogafundur NATO hófst í hollensku borginni Haag í dag en meginmarkmið fundarins er að samþykkja viðamikla áætlun um að auka útgjöld aðildarríkjanna til varnar- og öryggismála. Hollensku konungshjónin hafa boðið Evrópuleiðtogum í kvöldverð og þar verður Kristrún Frostadóttir forsætisráðherra fulltrúi Íslands. Formlegur fundur leiðtoganna fer svo fram í fyrramálið.