Rich Cushworth, frá Englandi, og eiginkona hans Mercedes Casanellas, frá El Salvador, áttu von á syni. Þegar Mercedes fór til læknis í El Salvador í mæðraskoðun sagði hann að vandmál væru komin upp varðandi meðgönguna og að hún þyrfti því að gangast undir keisaraskurð þegar í stað. Rich var erlendis og náði því ekki tímanlega á sjúkrahúsið.
Mercedes þurfti því að fara í gegnum þetta án þess að hafa hann við hlið sér. Að aðgerðinni lokinni fékk hún að halda á nýfæddum syni sínum í smástund áður en hann var fluttur á gjörgæsludeild til aðhlynningar. Hún sá hann síðan ekki næsta sólarhringinn.
Þegar hún sá hann næst sá hún strax að það var eitthvað sem passaði ekki. Hana grunaði að hún hefði fengið rangt barn í hendurnar. En læknarnir aftóku það með öllu og staðhæfðu að hún hefði fengið rétta barnið.
Eftir nokkurra daga dvöl á sjúkrahúsinu flugu hún og Rich heim til Texas í Bandaríkjunum með son sinn. En það var alltaf einhver efi innra með Mercedes og hann hélt áfram að vaxa með degi hverjum. Að lokum ákváðu þau hjónin að láta gera dna-rannsókn til að fá úr því skorið hvort Mercedes hefði rétt fyrir sér.
Þegar svarið kom var það nákvæmlega eins og hún hafði haldið. Þau voru ekki foreldrar drengsins sem þau höfðu nú hugsað um í níu mánuði. The Independent skýrir frá þessu. Rannsókn hófst strax á málinu til að hægt væri að finna son þeirra í El Salvador. Dna-rannsóknir voru gerðar á öllum mæðrunum sem höfðu legið á fæðingardeildinni með Mercedes. Á grunni þeirra var hægt að hafa uppi á hinni konunni sem hafði fengið rangan dreng með sér heim.
Í kjölfarið hófst töluverð pappírsvinna en á endanum tókst þeim að fá son sinn heim til Bandaríkjanna og hin móðirinn fékk son sinn í staðinn.
