Framvegis verða allir almenningsskólar í Texas að vera með  Boðorðin tíu sýnileg í skólastofum. Kveðið er á um þetta í nýjum lögum sem ríkisþingið samþykkti og Greg Abott, ríkisstjóri, hefur staðfest.

The Guardian skýrir frá þessu og segir að reiknað sé með að tekist verði á um lögin fyrir dómstólum því margir telji þau brjóta gegn ákvæði stjórnarskrárinnar um aðskilnað ríkis og kirkju.

Svipuð lög voru sett í Louisiana en alríkisdómstóll kvað upp úr um það á föstudaginn að þau brjóti gegn stjórnarskránni. Svipuð lög hafa einnig verið sett í Arkansas og er nú tekist á um þau fyrir alríkisdómstóli.

Candy Nobel, sem var meðal flutningsmanna frumvarpsins í ríkisþingi Texas, sagði að markmiðið með því sé að tengja saman það sem er sögulega og réttarfarslega mikilvægt fyrir bandarísku þjóðina.

Boðorðalögin eru meðal þeirra aðgerða sem gripið hefur verið til, aðallega í ríkjum þar sem Repúblikanar ráða ríkjum, til að reyna að koma trúarbrögðum inn í bandaríska skóla.

Þing Texas samþykkti einnig lög sem heimila fræðsluumdæmum að heimila starfsfólki skóla og nemendum þeirra að fara til bæna eða lesa trúarlega texta á skólatíma.