Maðurinn sem var handtekinn heitir Cody Balmer og er 38 ára. Hann er í haldi lögreglu og að sögn yfirvalda verður hann ákærður fyrir tilraun til manndráps, hryðjuverk, íkveikju og líkamsárás.
Shapiro var heima þegar Balmer bar að garði, en honum tókst að koma sér út ásamt eiginkonu sinni, fjórum börnum og hundi fjölskyldunnar.
Taliuð er að Balmer hafi stokkið yfir girðingu áður en hann braut sér leið inn í húsið þar sem hann kveikti í. „Hann var augljóslega með ákveðið plan,“ segir George Bivens, fulltrúi lögreglu, við bandaríska fjölmiðla.
Miklar skemmdir urðu á heimili ríkisstjórans þar sem eldurinn var fljótur að dreifa úr sér.
Balmer hefur áður komist í kast við lögin en hann var ákærður fyrir árið 2016 fyrir þjófnað og þá var hann ákærður fyrir líkamsárás árið 2023. Taka átti það mál fyrir á næstu dögum.
Móðir Balmer, Christie Balmer, segir í samtali við CBS að sonur hennar hafi glímt við geðræn vandamál og hann hafi hætt að taka lyf sín fyrir skemmstu. Hann hafi reynt að leita sér aðstoðar vegna heilsubrests en komið að lokuðum dyrum.
