Fyrir hálfri öld fundu vísindamenn næstum því heila steingerða höfuðkúpu og mörg hundruð bein úr 3,2 milljóna ára gamalli konu af manntegundinni Australopithecus afarensis. Hefur þessi kona stundum verið sögð vera „móðir okkar allra“. Henni var gefið nafnið Lucy eftir Bítlalaginu „Lucy in the Sky with Diamonds“.

Með aðstoð Lucy hafa vísindamenn getað leyst ýmsar ráðgátur varðandi þróun okkar mannanna en útlit hennar er hins vegar ráðgáta mikil. Það hefur verið vinsælt að stilla henni upp sem konu með þykkt, rauðbrúnt hár um allan líkamann, þar sem aðeins andlitið, hendurnar og brjóstin standa út úr þykkum feldinum.

En þessi ímynd af henni gæti verið vitlaus því niðurstöður rannsókna með nýrri tækni í erfðagreiningu benda til að Lucy hafi verið hárlaus eða því sem næst eða þá með mjög þunnt lag af hári á líkamanum.

Samkvæmt samþróunarkenningu manna og lúsa, þá misstu forfeður okkar megnið af feldi sínum fyrir 3 til 4 milljónum ára og byrjuðu ekki að nota föt fyrr en fyrir 83.000 til 170.000 árum síðan. Þetta þýðir einfaldlega að í 2,5 milljónir ára voru forfeður okkar naktir.