Sumir nota uppþvottabursta en aðrir nota svamp.
Ef þú notar svamp, þá skaltu gæta þess að þrífa hann reglulega. Hann getur nefnilega verið þéttsetinn af bakteríum að sögn Portal 6 sem segir að sérfræðingar segi að bakteríur, sem geta verið hættulegar heilsu fólks, elski að búa í svampinum því hann sé alltaf blautur og fullur af matarleifum.
En sem betur fer er ekki flókið að þrífa svampinn. Eitt besta ráðið er að leggja hann í bleyti í blöndu af vatni og ediki í fimm mínútur. Edikið drepur bakteríurnar og svampurinn verður mun hreinni. Þú getur því notað svampinn við næsta uppvask án þess að hafa áhyggjur af bakteríum í honum.
En svampurinn endist ekki að eilífu og segir Portal 6 að það eigi að skipta honum út aðra hverja viku því ef þú notar hann of lengi, þá getur verið erfitt að losna við bakteríurnar.