Á á fimmtudag í síðustu viku var 29 ára karlmaður framseldur frá Viktoríuríki í Ástralíu til New South Wales ríkis. Hann er grunaður um að hafa reynt að kúga milljónir út úr konu sem hann hafði áður rænt og beitt kynferðislegu ofbeldi.

The Guardian segir að maðurinn, sem heitir Yanyu Mu, hafi verið handtekinn í Melbourne á fimmtudaginn og nær strax framseldur til Sydney.

Lögreglan telur að hann sé forsprakki hóps karla sem neyddi 36 ára konu inn í bíl í Sydney í apríl.

Daginn eftir sagði hún lögreglunni að henni hefði verið byrluð ólyfjan og beitt kynferðislegu ofbeldi. Hún var flutt á sjúkrahús í kjölfarið og lögreglan hóf að rannsaka málið.

Lögreglan fann fatnað hennar, lyf og fjötra, sem eru taldir hafa verið notaðir á konuna, í ruslatunnu við hús í Eastwood í Sydney, ekki fjarri þeim stað þar sem hún var numin á brott.

Mu hefur verið ákærður fyrir að hafa beitt konuna kynferðislegu ofbeldi í samvinnu við fleiri, að hafa byrlað henni ólyfjan og að hafa stýrt aðgerðum hópsins.

Hann á einnig yfir höfði sér ákæru fyrir að hafa tekið kynferðisofbeldið upp og að hafa hótað konunni að birta upptökurnar nema hún greiddi honum sem nemur 27 milljónum íslenskra króna.