Maður sem var að hans sögn „þreyttur á því að borga“ þegar skórnir hans skemmdust ákvað að fá par af Nike strigaskóm flúrað á fæturna á sér. 35 ára húðflúrarinn Dean Gunther notaði ótrúlega hæfileika sína til að teikna uppáhaldsskó mannsins, byrjaði svo að flúra og bjó til óvenjulega en hrífandi sjónhverfingu.
Dean er upprunalega frá Bellville í Suður-Afríku en flutti til Bretlands fyrir 5 árum síðan. Hann varð nýlega frægur á samfélagsmiðlum fyrir að hafa flúrað raunverulegt „six-pack“ á maga manns.
Um verkið sitt sagði Dean: „Mig langaði að gera sjónhverfingu, láta það líta út fyrir það að hann sé klæddur skóm, þrátt fyrir það að hann sé berfættur. Það mun láta þig kíkja tvisvar.“
Dean, sem rekur eigin húðflúrsstofu í Manchester sem heitir DG Tattoo Art, fann skóparið sem viðskiptavininum leist best á, skoðaði það í þrívídd og teiknaði svo útlínurnar á fót mannsins fríhendis. Verkið tók Dean um tvo tíma að teikna og aðra átta að flúra báðar fætur.
„Að teikna flúrið fríhendis var erfiðasti hluturinn. Ég þurfti að passa upp á að allt passaði við lag fótanna. Stensill virkaði ekki í þessu tilfelli, þannig að þetta var allt fríhendis,“ bætti Dean við.
Listamaðurinn deildi verkinu sínu á TikTok og Instagram þar sem meira en tvær milljónir sáu og mikinn fögnuð mátti sjá yfir verkinu í athugasemdunum. Einn sagði: „Hann sparar stórfé á strigaskóm.“ Annar sagði: „Vá, djarfur að láta gera báða fætur,“ og enn annar: „Kexruglaður þessi, elska það.“