Skrifstofa Karls Bretaprins hefur neitað því að það hafi neitt ólöglegt átt sér stað þegar erfingi bresku krúnunnar tók við seðlapokum í gjöf frá katörskum stjórnmálamanni. Sunday Times greindi frá því að prinsinum voru gefnar um 424 milljónir króna af sjeiknum Hamad bin Jassim bin Jaber Al Thani, fyrrum forsætisráðherra Katar.

Þar kom fram að peningarnir hafi verið veittir Karli á einkafundum á árunum 2011 til 2015. Í eitt skiptið kom peningurinn í skjalatösku, annað í innkaupapokum merkt versluninni Fortnum og Mason, samkvæmt AP.

Í Sunday Times kom fram að peningurinn var lagður inn á reikning góðgerðasjóðs prinsins. Skrifstofa prinsins sagði í yfirlýsingu að „gjöfunum hafi um leið verið skipt á milli góðgerðasamtaka prinsins og að tryggt hafi verið að allt hafi farið eftir réttum ferlum.“ Ríkisstjórn Katar hefur ekki fengist til að tjá sig um málið.

Sem forsætisráðherra Katar milli 2007 og 2013 sá Hamad um ríkissjóð Katar sem fjárfestir miklum upphæðum í fasteignir um allan heim, meðal annars skýjakljúfinn the Shard í Lundúnum, Heathrow-flugvöll og stórverslunina Harrods.