Flestir „veislugestanna“ eru Bretar en einngi er töluverður fjöldi ferðamanna kominn til landsins til að taka þátt í gleðinni.
Fólk hefur streymt að stöðum sem tengjast konungsfjölskyldunni. Til dæmis að Tower of London, þar sem krúnudjásnin eru geymd, og til Westminster Abbey. En fáir hafa lagt leið sína að 17 Bruton Strett og fáir munu væntanlega fara þangað. Það er svo sem ekki mikið konunglegt við þessa skrifstofubyggingu þar sem kínverskur veitingastaður er á fyrstu hæðinni.
En þetta heimilisfang hefur verið hjúpað dulúðleika og flökkusögur hafa tengst því áratugum saman. Ástæðan er að hér fæddist Elizabeth Alexandra Mary Windsor þann 21. apríl 1926. Hún er betur þekkt sem Elísabet II drottning.
En drottningin fæddist ekki á kínverskum veitingastað eins og flökkusögur segja. Þegar drottningin fæddist var íbúðarhús á staðnum, þar sem foreldrar hennar bjuggu, ekki kínverskur veitingastaður og skrifstofur. Núverandi bygging er yngri en drottningin.
Önnur útbreidd flökkusaga er að húsið hafi eyðilagst í sprengjuárásum Þjóðverja í síðari heimsstyrjöldinni en það er heldur ekki rétt. BBC segir að húsið, þar sem drottningin fæddist, hafi verið rifið 1937 en þá var fjölskylda Elísabetar flutt í Buckingham höll.
En svo vikið sé aftur að hátíðarhöldunum þá fylgdist Elísabet II með þeim frá svölum Buckingham hallar í gær. Í gærkvöldi tilkynnti hirðin að hún muni ekki verða viðstödd alla þá viðburði sem hún hafði ætlað sér. Það þarf kannski að koma á óvart því hún er orðin 96 ára og heilsu hennar hefur hrakað síðustu mánuði.