Þann 19. maí 2016 hrapaði flugvél Egypt Air í hafið á milli Krítar og norðurhluta Egyptalands. Allir 66 sem voru um borð fórust. Í nýrri skýrslu franskra flugmálayfirvalda er skýrt frá því hvað varð til þess að vélin hrapaði.

Ástæðan fyrir slysinu var að flugmaðurinn, Mohamed Said Shoukair, ákvað að svala nikótínþörf sinni og reykja í flugstjórnarklefanum. Það var örlagarík ákvörðun svo ekki sé meira sagt.

New York Post segir að við þetta hafi eldur kviknað í flugstjórnarklefa vélarinnar, sem var af gerðinni Airbus A320, því það kviknaði í súrefni sem lak úr súrefnisgrímu í flugstjórnarklefanum.

Eins og áður sagði voru 66 um borð. 10 manna áhöfn, 12 franskir ríkisborgarar og 30 egypskir ríkisborgarar auk 14 farþega af ýmsum þjóðernum.

Í Egyptalandi var fólk sannfært um að hryðjuverkamenn hefðu grandað vélinni og því var haldið fram að leifar af sprengiefni hefðu fundist á sumum hinna látnu. En allir aðrir vísuðu þessu á bug.

Bandarískt herskip hífði flugvélina og svarta kassann af hafsbotni.

Á upptökum svarta kassans heyrist greinilega að súrefni lak úr súrefnisgrímunni, skipt var um hana þremur dögum fyrir slysið af starfsmanni Egypt Air. En gríman var stillt á neyðarstillingu sem varð til þess að súrefni lak úr henni.

Hversu ótrúlegt sem það má virðast þá var egypskum flugmönnum heimilt að reykja í flugstjórnarklefanum á þessum tíma. Þessi heimild var síðan afnumin.

Egypsk yfirvöld hafa ekki viljað birta sína niðurstöður og segja að niðurstaða franskra yfirvalda sé ekki rétt.