Í húsi einu búa átta karlmenn. Einn þeirra er hommi og það er bara hann sem veit það. Í lok hvers þáttar eiga þátttakendurnir að giska á hver þeirra er hommi. Ef þeir hafa rétt fyrir sér er hommanum sparkað úr þættinum og hinir sjö deila með sér tveimur milljónum rúbla. Ef þeir hafa rangt fyrir sér sigrar homminn.

Þetta er innihald rússnesks raunveruleikaþáttar sem heitir „Ég er ekki hommi“.

Þátturinn hefur hneykslað marga utan Rússlands og ekki þykir bæta úr skák að þáttastjórnandinn er Vitaly Milonov en hann er þingmaður úr flokki Vladímír Pútíns forseta.

Milonov er þekktur andstæðingur samkynhneigðra og hefur staðið á bak við lagasetningar sem beinast gegn samkynhneigðum. The Times skýrir frá þessu.

„Að finna homma í landinu okkar er eins og að finna opinn McDonalds. Þeir eru til en eru mjög fáir og fáir vita um þá,“ segir hann í upphafi þáttarins.

Síðar í þættinum hittir hann þátttakendurna og kemur með ákveðna hvatningu til þeirra: „Ég vona að þið finnið hommann fljótt,“ segir hann og strýkur um leið fingri þvert yfir háls sinn.

Vice segir að kannanir hafi sýnt að 20% Rússa telji að útiloka eigi hommar og lesbíur úr samfélaginu.

Samtök hinsegin fólks utan Rússlands hafa gagnrýnt þættina en það virðist ekki hafa áhrif á rússneska áhorfendur því þættirnir njóta að sögn töluverðra vinsælda þar í landi.