Eftir því sem sænsku læknarnir Anders Hansen og Carl Johan Sundberg segja í bók sinni „Hälsa på recept“ (Hreyfing sem lyf) þá getur 30 mínútna hreyfing á dag skilað okkur lengri ævi og minni líkum á að fá ýmsa sjúkdóma.
Í bókinni fara þeir yfir jákvæð áhrif hreyfingar og byggja á niðurstöðum nýjustu rannsókna en bókin kom út 2015.
Segja má að inntak bókarinnar sé að líf þitt verði lengra og betra og minni líkur á að þú fáir ýmsa sjúkdóma. En þú verður að leggja eitthvað á þig til þess, líkamlega. Ekki mikið, þannig séð. 10 mínútna hreyfing á dag er betra en ekkert en hálf klukkustund er það sem stefna skal á. Best er að ná 30 mínútna hreyfingu á dag. Göngutúrinn þarf að vera röskur, þannig að þú finnir fyrir smá mæði. Það þýðir ekkert að lulla bara áfram. Það má líka skipta honum í tvennt og fara í tvo 15 mínútna göngutúra.
Þeir benda á að hreyfing geti unnið gegn kvíða og sé sannkallað sælgæti fyrir heilann því hún auki virkni hans og geri honum betur kleift að endurnýja heilafrumur, styrki minnið og dómgreindina.
Meðal þeirra helstu kosta sem þeir nefna í tengslum við 30 mínútna daglega hreyfingu eru:
Þú lifir að meðaltali 3-5 árum lengur.
Hálfrar klukkustundar dagleg hreyfing eykur viðnám þitt gegn kvefi og þess háttar pestum.
Í göngutúr eykst blóðflæðið til heilans um fjórðung. Það eru því ekki bara fæturnir sem njóta góðs af auknu blóðflæði.
100 mismunandi gen í heilanum virkjast þegar þú hreyfir þig.
Þótt þú hafi ekki hreyft þig fram að þessu þá skilar hreyfing ávinningi, til dæmis veita göngutúrar vernd gegn Alzheimerssjúkdómnum.
Regluleg hreyfing kennir líkamanum að bregðast ekki svo harkalega við stressi.
Fólk í yfirþyngd, sem er í góðu formi, á síður á hættu að veikjast og deyja fyrir aldur fram en grönn sófakartafla.
