Á Suðurskautinu er fjöldi eldfjalla en þau eru falin undir ís. Í heildina eru rúmlega 100 eldfjöll í heimsálfunni. Árið 2017 uppgötvuðu vísindamenn stærsta eldfjallasvæði heims á Suðurskautinu en það er á tveggja kílómetra dýpi undir íshellunni á vesturhlið heimsálfunnar. Eitt hæsta eldfjallið er á hæð við fjallið Eiger í Sviss en það er 3.967 metrar á hæð.

Það voru vísindamenn frá Edinborgarháskóla sem uppgötvuðu svæðið og segja að það sé líklega hluti af Austur-Afríku eldfjallahryggnum en þar er talið að þéttasta svæði eldfjalla í heiminum sé.

Eins og staðan er núna eru aðeins tvö virk eldfjöll á Suðurskautslandinu, Mount Erebus og Deception Island. Þau eru bæði einstök hvað varðar jarðfræðilega uppbyggingu, algjörlega ólík öðrum eldfjöllum hér á jörðinni.

Vísindamenn segja að eldfjöllin á Suðurskautinu muni líklega ekki valda neinni hættu á næstunni en sumir telja að gos í þeim geti haft áhrif um allan heim. John Smellie, prófessor í eldfjallafræði við University of Leicester, hefur sagt að ekki sé hægt að útiloka að gos í þessum eldfjöllum muni valda því að mikið magn vatns muni flæða til sjávar þegar íshellan bráðnar og þar með muni yfirborð sjávar hækka. Hann sagði að eitt eldgos muni í sjálfu sér ekki valda neinum stóratburðum í þessa veru en ef mörg eldfjöll gjósi geti staðan orðið allt önnur.

Hvað varðar ferskvatnsbirgðir heimsins þá eru um 80% þeirra á Suðurskautslandinu. Ef allur sá ís, sem þær eru nú, myndi bráðna myndi yfirborð sjávar hækka um 60 metra. Það myndi gera jörðina óbyggilega fyrir fólk.