Pítsur, pasta, pestó og parmesan, þetta eru allt vel þekktar matvörur sem eiga rætur að rekja til Ítalíu. Ítalskur matur og ítölsk matargerð er vinsæl um allan heim og ítalskar matvörur eru yfirleitt tengdar við gæði og vinsældir. En eftirlíkingar af ítölskum matvörum eru nú orðnar að svo umfangsmiklum iðnaði að það er hættulegt að sögn Luigi Di Maio, utanríkisráðherra landsins.

Víða um heim eru gerðar eftirlíkingar af ítölskum mat. Í ræðu sem Di Maio hélt í byrjun mánaðarins á ræðu ítalskra matvælaframleiðenda kynnti hann nýja aðgerðaáætlun um kynningu á ítalskri framleiðslu. Í henni felst að ríkisstjórnin heitir því að grípa til aðgerða til að vernda ítalska framleiðendur.

Ráðherrann sagði að umfang eftirlíkingaframleiðslu á ítölskum matvörum væri orðið mjög mikið og mikið áhyggjuefni. Hann lagði áherslu á að utanríkisráðuneytið vinni hörðum höndum að því að berjast gegn eftirlíkingum af ítölskum vörum um allan heim. Þessi barátta fer fram innan ESB og í Róm sitja opinberir starfsmenn og leita á internetinu að fölskum ítölskum ostum, vínum eða tómatsósu.

Samkvæmt nýju áætluninni verða starfsmenn ráðnir til sendiráða víða um heim til að annast vernd ítalskrar framleiðslu.