Óhætt er að segja að bjórmarkaðurinn í Mjanmar sé mjög góður fyrir danska framleiðendann Carlsberg og hollenska framleiðandann Heineken þessa dagana. Það sama gildir um taílenska framleiðandann Chang. Sala á bjór frá fyrirtækjunum hefur aukist mjög síðan herinn tók völdin í landinu þann 1. febrúar. Landsmenn sniðganga bjór frá verksmiðjum sem eru í eigu hersins til að láta óánægju sína með hann í ljós og því græða evrópsku framleiðendurnir.

Áður en herinn rændi völdum sátu brugghús í hans eigu að um 70% bjórmarkaðarins í landinu en nú er talið að hlutfallið sé komið undir 30% og aðrir heimildarmenn segja að samdrátturinn nemi 80-90% að sögn netmiðilsins Frontier Myanmar. Brugghús í eigu hersins framleiða meðal annars bjórtegundirnar Myanmar Beer, Andaman Gold og Black Shield. Myanmar Brewery er í eigu hersins og er óhætt að segja að landsmenn fyrirlíti fyrirtækið eftir valdaránið en fjöldi landsmanna hefur látið lífið eða slasast í óeirðum og mótmælum eftir það.

Carslberg og Heineken hafa látið lítið fyrir sér fara hvað varðar pólitísk málefni eftir valdaránið enda málið viðkvæmt og gæti haft mikil pólitísk áhrif á fyrirtækin ef þau blanda sér á einhver hátt í það.

En það virðist sem evrópsku brugghúsin og það taílenska njóti stuðnings almennings enda eru þau algjörlega óháð hernum fjárhagslega og koma hvergi nærri honum en hann teygir anga sína víða í efnahagslífi landsins.

Bjórsala fyrirtækjanna hefur aukist svo mikið að þau anna ekki eftirspurn. Kaupmenn segja að bjórinn frá fyrirtækjum hersins seljist ekki og þeir sitji uppi með mikið magn af honum. Bjórverð hefur hækkað um 10 til 20% vegna þess að brugghúsin anna ekki eftirspurn og glíma við skort á dósum og flöskum segir Frontier Myanmar.

Hinn vinsæli Yoma bjór frá Carlsberg fór að seljast enn betur eftir valdaránið og fljótlega skorti fyrirtækið dósir undir bjórinn. Því var byrjað að tappa honum á flöskur. Tuborg frá Carlsberg er einnig mjög vinsæll í landinu.