Á laugardaginn var Loyalti Allah, 13 ára, skotin til bana þar sem hún sat á bekk í Monroe, sem er í útjaðri Charlotte í Norður-Karólínu í Bandaríkjunum, og drakk gosdrykk.

Ekkert óeðlilegt var á seyði á svæðinu þar til stórum fjórhjóladrifsjeppa var ekið fram hjá. Rúðurnar voru skrúfaðar niður og fjölda skota skotið að Allah og vinkonu hennar. Allah lést en vinkona hennar slapp lifandi frá árásinni. People skýrir frá þessu.

Ekki er vitað af hverju skotið var á stúlkurnar en að skothríðinni lokinni var bifreiðinni ekið hratt á brott.

Á sunnudaginn handtók lögreglan fjóra menn á aldrinum 18 til 22 ára sem eru grunaðir um skotárásina. Einn þeirra, Javon Demontre Robinson 20 ára, sagði í yfirheyrslu hjá lögreglunni að honum þætti leitt að Allah hefði látist. „Það átti ekki að gerast,“ sagði hann að sögn People.