Um miðjan júlí var byrjað að bólusetja 12-15 ára börn í Danmörku gegn COVID-19 og gátu foreldrar þeirra þá pantað tíma fyrir þau í bólusetningu. Í gær var staðan sú að rúmlega 12% af aldurshópnum hafði þegar fengið einn skammt af bóluefni en aðeins er bólusett með bóluefnum frá Moderna og Pfizer/BioNTech í Danmörku.
Upphaflega átti ekki að bjóða upp á bólusetningar fyrir þennan aldurshóp fyrr en í haust en nú er staðan sú að Danir eiga nóg af bóluefnum eftir að þeir keyptu um 1,2 milljónir skammta af Pfizer/BioNTech af Rúmenum fyrir nokkrum vikum. Því var ákveðið að hraða bólusetningu þessa aldurshóps til að reyna að komast nær hjarðónæmi.
Heilbrigðisyfirvöld eru ánægð með þátttöku aldurshópsins til þessa, sérstaklega í ljósi þess að nú er almennur sumarleyfistími í Danmörku og margir því á faraldsfæti og geta ekki mætt í bólusetningu.
Í heildina hafa rúmlega 50% Dana, um þrjár milljónir, lokið bólusetningu og rúmlega fjórar milljónir, um 70%, hafa hafið bólusetningu.
