Dönsk skattyfirvöld hafa á undanförnum árum fylgst vel með meðlimum skipulagðra glæpagengja því lífsstíll þeirra passar oft ekki við uppgefnar tekjur þeirra. Það þykir ekki líklegt að maður, sem er á opinberri framfærslu, geti ekið um á nýjum Mercedes Benz eða Harley Davidson mótorhjóli.

Frá 2018 hafa skattyfirvöld tekið 7.300 mál, tengd meðlimum í skipulögðum glæpasamtökum, til skoðunar. Í kjölfarið hafa skattyfirvöld krafið þá um 530 milljónir danskra króna, sem svarar til um 10.000 milljóna íslenskra króna, í skatt.

Í þessum athugunum sínum spyrja skattyfirvöld hvernig fólk hafi ráð á að kaupa dýran bíl, hvernig það fjármagnar dýran lífsstíl sinn og hvaðan peningarnir koma. Eins og gefur að skilja eiga meðlimir skipulagðra glæpasamtaka erfitt með að útskýra þetta því tekjuöflunarleiðir þeirra þola illa dagsljós.

„Við vitum að skipulögð glæpasamtök eru þar sem hægt er að hafa tekjur af afbrotum. Það er því miður hægt að hafa tekjur af því að svindla á sköttum og gjöldum og með rekstri fyrirtækja sem skilja eftir sig háar skuldir við ríkissjóð,“ sagði Morten Bødskov, ráðherra skattamála.

Hann sagði einnig að meðlimir skipulagðra glæpasamtaka fái stundum ráðgjöf um hvernig þeir eigi að byggja fyrirtæki upp þannig að þeir geti farið á svig við lög og reglur um virðisaukaskatt og annan skatt.