Vísindamenn telja sig hafa fundið hreinasta loftið hér á jörðinni. Það er yfir Suður-Íshafinu á Suðurskautinu. Þeir segja að þar sé engar agnir, sem verða til af mannavöldum, að finna í loftinu.

CNN skýrir frá þessu. Fram kemur að vísindamenn við Colorado State University í Bandaríkjunum segi að erfitt sé að finna einhvern stað hér á jörðinni sem er algjörlega ósnertur af mannavöldum því loftslagið breytist svo hratt af völdum okkar mannanna.

Um er að ræða fyrstu rannsókn sögunnar af þessu tagi að sögn vísindamannanna. Þeir mældu magn agna í andrúmsloftinu en það hefur aldrei áður verið gert sunnan við fertugustu breiddargráðu.

DNA rannsóknir voru gerðar á þeim ögnum sem fundust til að hægt væri að rekja uppruna þeirra. Niðurstaðan var að Suður-Íshafið sé nær ósnortið af ögnum sem eiga rætur að rekja til manna.

Niðurstöður rannsóknarinn voru birtar í vísindaritinu Proceedings of The National Academy of Sciences.