Mark Rutte, forsætisráðherra Hollands, hefur skipt um skoðun varðandi gamla hollenska hefð sem hefur lengi verið sögð bera merki kynþáttahyggju. En þrátt fyrir að hafa skipt um skoðun styður hann ekki bann við þessum sið.

Ástæðan fyrir skoðanaskiptum forsætisráðherrans eru hin miklu Black Live Matters mótmæli víða um heim og mál George Floyd sem var drepinn af lögreglumanni í Minneapolis í Bandaríkjunum. Mótmælin hafa borist til Hollands því mótmælt hefur verið í Amsterdam. CNN skýrir frá þessu.

„Svarti-Pétur“ eða „Zwarte Piet“ á hollensku gengur út á að í byrjun desember klæða börn og fullorðnir sig sem sem „Zwarte Piet“ þegar ævintýrapersónuninni og staðgengli jólasveinsins, Sinterklaas, er fagnað. Fólk málar andlit sitt svart, setur á sig hárkollu með krullum, rauðar varir og stóra eyrnalokka til að líkjast „Zwarte Piet“. Síðan er piparkökum deilt út til fólks.

Þessi hefð hefur lengi sætt gagnrýni fyrir að bera merki kynþáttahyggju en hefur fram að þessu haldið velli í Hollandi. En hugsanlega verða breytingar þar á nú.

Rutte sagði í síðustu viku að hann hafi skipt um skoðun varðandi hefðina en styðji samt sem áður ekki bann við henni. Hann sagðist þó telja að hún muni líða undir lok með tímanum samhliða breytingum á samfélagslegum viðmiðum.