Í apríl taldi lögreglan sig hafa komist að hver stóð að baki að minnsta kosti þremur af tíu morðum sem voru framin í Hwaseong, borg sunnan við höfuðborgina Seoul, frá 1986 til 1991.
CNN hefur eftir talsmanni lögreglunnar að maðurinn hafi nú játað að hafa myrt níu af þessum tíu. Auk þess játaði hann fimm morð til viðbótar og um 30 kynferðisbrot. Eitt af morðunum tíu í Hwaseong er nú talið vera verk eftirhermumorðingja.
Maðurinn, sem er á sextugsaldri, situr nú þegar í fangelsi þar sem hann afplánar lífstíðardóm. Hann verður ekki ákærður fyrir morðin því morð fyrnast í Suður-Kóreu og síðasta morðið fyrndist 2006.
Hann hafði áður verið yfirheyrður um morðin en neitað að vita neitt um þau. Eftir að lögreglan hafði byggt málin vel upp breyttist afstaða mannsins í síðustu viku og hann játaði morðin. Hann gaf ítarlega játningu og teiknaði morðvettvanga upp. Lögreglan mun nú rannsaka hvort játningar hans séu réttar. Fórnarlömbin voru allt frá unglingsstúlkum til kvenna um sjötugt.
