Þegar Sylvi Witsø Standal, sem býr í Álasundi í Noregi, birti nýlega auglýsingu á sölusíðu á Facebook átti hún ekki von á þeim miklu viðbrögðum sem hún fékk við auglýsingunni. Hún var að selja hægindastól og tók auðvitað mynd af honum og birti með auglýsingunni. Hún tók mynd þar sem allur stóllinn sést en þegar hún setti hana inn á Facebook birtist bara efsti hluti hennar og það breytti öllu.

„Það komu margar góðar athugasemdir, já. Eftir nokkrar mínútur fékk ég tilkynningar í innhólfið og á Snapchat um myndina og þá áttaði ég mig á hvað hafði gerst,“ sagði hún í samtali við Norska ríkisútvarpið.

Margir, sem sáu myndina, töldu að Sylvi væri að reyna að selja kynlísleikfang, titrara, sem væri sérstaklega góður því í sölulýsinguna skrifaði hún „nokkur klórför á bakinu“. „Vinur mannsins míns hringdi í hann og spurði hvort ég væri búin að selja titrarann minn,“ sagði hún einnig. Eiginmaðurinn skildi ekki upp né niður í þessu því hann vissi ekki um auglýsinguna.

Athugasemdum rigndi inn í athugasemdakerfinu við auglýsinguna og virtist fólk skemmta sér vel yfir auglýsingunni. „Konan sagði að það virðist vera gott að sitja á honum,“ skrifaði Stefan Solberg Tomren við auglýsinguna. „Flestir sem sáu auglýsinguna sáu stórt typpi. Við sáum strax hvað þetta var. Það var svo fyndið að seljandinn áttaði sig ekki á þessu,“ sagði Tomren í samtali við Norska ríkisútvarpið.