Í heildina þarf að lóga 15 til 18 milljónum minka í Danmörku. Stjórnmálamenn og lögspekingar eru ekki á einu máli um þörfina á því að dýrunum verði lógað eða hvort það sé yfirhöfuð löglegt. En heilbrigðissérfræðingar eru ekki í neinum vafa, aflífa þarf minkana.
Þetta kemur fram í umfjöllun Jótlandspóstsins um málið. Þar segir að sérfræðingarnir taki undir áhyggjur dönsku smitsjúkdómastofnunarinnar af málinu. Einn þessara sérfræðinga er Jan Pravsgaard Christensen hjá ónæmis- og örverufræðideild Kaupmannahafnarháskóla. Hann segir ákvörðun ríkisstjórnarinnar rétta.
„Ef til verður stökkbreytt afbrigði, sem getur lifað af af því að bóluefnið virkar ekki á það, eigum við á hættu að veiran breiðist út til fjölda fólks án þess að við eigum svar við því,“ sagði hann og lagði áherslu á að veirur séu sífellt að breyta sér og stökkbreytast.
„Þegar veiran barst til Evrópu frá Kína sáum við að hún breyttist og þannig er það. Vandamálið með alla þessa minka er að þeir eru mjög áhrifaríkur drifkraftur hvað varðar stökkbreytingar og útbreiðslu stökkbreyttrar veiru. Af þeirri ástæðu verðum við að stöðva fæðukeðjuna,“ sagði Pravsgaard.
Christian Wejse, læknir og lektor á háskólasjúkrahúsinu í Árósum, er sama sinnis og segir engan vafa leika á því út frá heilbrigðissjónarmiðum að rétt sé að aflífa alla minkana. Hann sagði að það skipti engu máli þótt umrætt stökkbreytt afbrigði kórónuveirunnar hafi ekki fundist í fólki síðan í september, vandamálið sé að minkabú séu „stökkbreytingaverksmiðjur“.
