Stórt gosglas, fullur poki af nammi og feitt poppkorn fylgir því yfirleitt að fara í bíó eða eyða kvöldi með vinunum. Árum saman hafa ríkisstjórnir, læknar og hinir ýmsu heilbrigðissérfræðingar reynt að draga úr neyslu sykurs um allan heim. Nú bendir allt til þess að kórónuveirufaraldurinn og lokun veitingastaða, bíóhúsa og aflýsingar á íþróttaviðburðum hafi gert það sem engum hefur tekist fram að þessu.

Í fyrsta sinn í fjóra áratugi er útlit fyrir að neysla sykurs á heimsvísu hafi dregist saman, Bloomberg skýrir frá þessu. Samkvæmt miðlinum hefur sala á gosdrykkjum og sælgæti minnkað hjá meðal annars Coca-Cola og Nestle.

Á fyrstu þremur vikum apríl féll salan hjá Coca-Cola um 25%. Fyrirtækið hefur einnig greint frá því að kórónuveirufaraldurinn muni hafa mikil áhrif á annan ársfjórðung þessa árs. Neysla utan heimilisins er yfirleitt meiri en hún er innan þess. Sérfræðingur hjá matvælafyrirtækinu Czarnikow Group í London segir að fólki finnst ekkert mál að drekka heilan lítra af gosi í bíó, en myndi sennilega ekki drekka svo mikið gos yfir Netflix heima í stofu.

Samkvæmt Bloomberg hefur salan einnig dregist saman hjá Pepsi á öðrum ársfjórðungi og sérfræðingar telja að sykurneysla muni minnka um 1,2 % á heimsvísu í ár, það samsvarar tæplega 170 milljónum tonna af sykri.

Enn er óljóst hve hratt sykurneyslan mun aukast aftur eftir opnun veitingastaða og bíóhúsa.