Hryðjuverkadeild hollensku lögreglunnar hélt blaðamannafund fyrir nokkrum mínútum þar sem Pieter-Jaap Aalbersberg ræddi við fréttamenn um atburðina í Utrecht í morgun. Hann sagði að skotum hefði verið hleypt af á nokkrum stöðum í borginni í morgun. Hann sagði að enginn hafi verið handtekinn vegna málsins og lögreglan viti ekki hver eða hverjir standi að baki þessu né ástæðu þess.

Lögreglan hefur staðfest að einn hafi látist þegar skotið var á sporvagn í miðborginni. Sjö, hið minnsta, eru særðir en ekki hefur verið skýrt frá alvarleika meiðsla þeirra.

Þungvopnaðir lögreglumenn hafa umkringt fjölbýlishús í borginni en lögreglan hefur ekki skýrt nánar frá af hverju.

Lögreglan sendi frá sér tilkynningu á Twitter fyrir stundu þar sem íbúar í Utrecht eru beðnir um að halda sig innan dyra, ekki sé hægt að útiloka fleiri árásir.