Chiara Jaconis var á gangi með kærasta sínu, Livio Rousseau, um spænska hverfið í Napólí í september 2024 þegar hún fékk tveggja kílóa styttu í höfuðið. Í ljós kom að styttunni hafði verið kastað fram af svölum húss fyrir ofan og var sökudólgurinn 13 ára drengur. Höggið var mikið enda var styttunni kastað úr 10 metra hæð.
Chiara hlaut alvarlega höfuðáverka og lést hún á sjúkrahúsi nokkrum dögum síðar.
Ítalskir saksóknarar halda því fram að foreldrar drengsins hafi ekki gripið til nauðsynlegra varúðarráðstafana þrátt fyrir að hafa vitað að hann ætti þetta til.
Drengurinn, sem saksóknarar lýsa sem vandræðabarni, hafði áður kastað spjaldtölvu, fjarstýringu fyrir loftkælingu og þvottaklemmum niður af svölunum, samkvæmt frétt La Ragione sem New York Post fjallar um.
Fyrir dómi í síðustu viku kom fram að um 15 mánuðum fyrir andlát Jaconis hafi móðir drengsins lýst áhyggjum sínum við barnfóstru hans að hann gæti tekið upp á því að kasta hlutum fram af svölunum.
Þegar atvikið átti sér stað var Jaconis, sem var frá Padua, á leið út á flugvöll eftir rómantíska ferð til Napoli með Livio.
Drengurinn var sýknaður af allri saknæmri háttsemi í málinu þar sem börn undir 14 ára aldri bera ekki refsiábyrgð samkvæmt ítölskum lögum. Saksóknarar hafa hins vegar farið fram á að foreldrar hans verði ákærðir fyrir manndráp af gáleysi.
Þeir halda því fram að foreldrarnir hafi ekki gripið til nægjanlegra ráðstafana, svo sem varðandi læsingar, til að koma í veg fyrir að sonur þeirra kæmist út á svalirnar.
Foreldrar drengsins neita alfarið sök. Lögmaður þeirra, Carlo Bianco, segir að um hafi verið að ræða harmleik og tvær fjölskyldur séu nú í sárum egna hans.
Réttarhöld verða haldin 26. júní þar sem ákveðið verður hvort foreldrunum verði gert að sæta ákæru. Jaconis hafði starfað hjá Prada frá október 2022, samkvæmt LinkedIn-síðu hennar. Hún hafði áður starfað fyrir tískumerkin L’Oréal, Givenchy og Christian Louboutin í París.
