Bandaríska alríkislögreglan, FBI, handtók á föstudag karlmann sem grunaður er um að hafa lagt líf fjölskyldu einnar í rúst, eða allt að því, með ítrekuðu áreiti.
Maðurinn sem um ræðir heitir Loren Okamura og er búsettur á Hawai. Hann er grunaður um að hafa stundað það að senda fólk að heimili fjölskyldu einnar í Utah í yfir 500 skipti á rúmu ári. Hann pantaði til dæmis vændiskonur, pítsur, viðgerðarmenn; pípulagningarmenn, smiði og lásasmiði til dæmis að heimili Gilmore-fjölskyldunnar í úthverfi Salt Lake City. Þá setti hann myndir af fjölskyldumeðlimum á netið, bað um að fíkniefni væru send að heimilinu og hafði í hótunum.
Lögreglu hafði lengi grunað að Okamura væri að verki þar sem hann hafði horn í síðu fjölskyldunnar. Lögregla hefur ekki útlistað nánar hvað átti sér stað áður en Okamura byrjaði á þessu en svo virðist sem um einhverjar óuppgerðar sakir hafi verið að ræða.
Rannsókn málsins tók langan tíma, ekki síst í ljósi þess að Okamura passaði sig á því að hylja slóð sína á veraldarvefnum. Fulltrúar FBI fóru þó til Hawai í liðinni viku og handtóku Okamura. Verði hann fundinn sekur gæti hann átt þungan dóm yfir höfði sér.