„Við höfðum reynt að setja hluti þarna í samband en án árangurs,“ segir Darren Steels, 45 ára Breti, sem gerði skemmtilega uppgötvun á heimili sínu fyrir skemmstu.

Þannig er mál með vexti að á besta stað í húsinu er innstunga á veggnum. Innstungan liggur við stigann og því hentugt að skella til dæmis ryksugunni í samband þegar farið er yfir stigann. En gallinn á gjöf Njarðar var bara sá að innstungan virkaði ekki.

Darren hafði búið í húsinu í tvö ár þegar hann fékk rafvirkja til að kíkja á vandamálið. Rafvirkinn rak upp stór augu þegar hann opnaði innstunguna því þá kom í ljós að um var að ræða einskonar leynihólf – sennilega til að geyma lítil verðmæti eins og skartgripi. Það dettur jú eflaust fáum innbrotsþjófum í hug að leita á stöðum sem þessum.

Darren birti myndband af þessu á samfélagsmiðlum og er óhætt að segja að það hafi vakið mikla athygli. 60 þúsund manns hafa þegar horft á það og segja margir að um skemmtilega uppgötvun sé að ræða. „Það er ein innstunga heima hjá mér sem virkar ekki. Ég veit hvað ég ætla að gera þegar ég kem heim.“