Þessa dagana sitja sex manns á ákærubekk í Lundi í Svíþjóð en fólkið er ákært fyrir mannrán og misþyrmingar á konu á þrítugsaldri. Konan var beitt mjög grófu ofbeldi og er mörgum Svíum mjög brugðið vegna málsins.

Aftonbladet skýrir frá þessu. Hin ákærðu eru fjórir karlar og tvær konur. Dauðri kráku var troðið upp í munn konunnar og henni var einnig misþyrmt með hitalampa, hamri og mörgum oddhvössum hlutum. Þá var allt hárið rakað af henni. Fjórtán ára barn var vitni að hluta af misþyrmingunum.

Konunni tókst að flýja úr haldi mannræningjanna eftir rúmlega sólarhring. Á þessum sólarhring sætti hún fyrrgreindum misþyrmingum og var einnig pakkað inn í yfirbreiðslu og límband sett yfir munn hennar og hendur og fætur límdir saman.

Konan þekkir flest hinna ákærðu og telur að ástæðan fyrir ofbeldinu og brottnáminu hafi verið öfundsýki og bílslyss fyrir níu árum en þá lést karlmaður. Konan var farþegi í bílnum og var sökuð um að hafa sett slysið á svið.